ФЕД ги качува каматите: историјата покажува дека падот на берзите е краткотраен

Ако Федералните резерви денес ги зголемат каматните стапки, како што очекуваат многумина на Волстрит, пазарите би можеле да доживеат помали потреси. Но, според историските податоци, тие загуби би можеле да бидат краткотрајни.

Анализата на стратезите од „The Kobeissi Letter“ опфаќа седум епизоди од 1988 година наваму, кога ФЕД првпат во еден циклус ги качил каматните стапки. Според неа, S&P 500 во просек паѓал за 4,0 отсто во првите шест недели по првото качување. Сепак, берзанскиот индекс ги надоместил сите тие загуби во следните пет до шест недели, во просек.

„Качувањето на каматите од страна на ФЕД историски биле одлични можности за купување“, додале стратезите.

Пазарите во голема мера очекуваат зголемување на каматните стапки од 25 базични поени на денешниот состанок за политика на Федералните резерви. Одлуката доаѓа во услови кога упорните податоци за инфлацијата — од индексот на потрошувачки цени до индексот на производителски цени — и растечките трошоци за енергија ги принудуваат централните банкари повторно да заострат. Доколку се реализира, ова би било прво зголемување на каматните стапки од јули 2023 година.

Инвеститорите исто така внимателно ги следат ажурираните економски проекции и „точкестиот дијаграм“ на ФЕД, за да ги проценат идните движења на стапките. Јастребски настроен точкест дијаграм и коментари од претседателот на ФЕД, Кевин Ворш, би можеле дополнително да ги зголемат трошоците за задолжување и првично да извршат притисок врз берзите ширум светот.

„Нашите американски економисти исто така очекуваат дека ФЕД денес ќе ги качи стапките, бидејќи растот останува солиден, пазарот на трудот закрепна, а инфлацијата мерена преку PCE покажа ограничени докази дека се враќа кон целта. Покрај тоа, индикаторите насочени кон иднината сугерираат дека пречекорувањето на инфлацијата веројатно ќе продолжи извесно време. Сепак, со оглед на тоа што качувањето е главно вградено во цените на пазарите, клучното прашање за нив е како претседателот Ворш и најновиот точкест дијаграм ќе го врамат циклусот на заострување“, изјави стратегот на „Deutsche Bank“, Џим Рид.