Фабрегас не сакаше да коментира за наводна понуда од Јунајтед: „Ова прашање е невкусно

Тренерот на Комо, Сеск Фабрегас, одби да одговори на прашањето дали примил понуда од Манчестер Јунајтед за да го наследи Мајкл Карик на тренерската позиција, оценувајќи го прашањето како невкусно и недоволно почитувачко кон еден голем фудбалер и тренер.

Фабрегас направи историја со Комо откако го однесе тимот во Лигата на шампионите, а италијанскиот претставник веќе го живее сонот и е дел од најелитното европско натпреварување. Комо го отвори настапот со победа против Ред Бул Лајпциг, потоа загуби во второто коло од Феенорд во Холандија, а во третото коло на домашен терен го чека премиерлигашки предизвик против Манчестер Јунајтед.

Токму во најавата за тој натпревар, Фабрегас доби прашање на кое не сакаше да даде одговор. Поради извонредната работа која ја врши, шпанскиот стратег е доста популарен во Англија и неговите резултати будно ги следат експертите, па еден од новинарите директно го запраша дали примил понуда од Јунајтед за да го наследи Карик.

„Нема да одговорам на тоа прашање бидејќи сметам дека е доста невкусно. Мислам дека со ова прашање не се покажува доволно почит кон еден голем фудбалер и тренер каков што е Мајкл Карик. Ќе го прескокнам ова прашање“, изјави Фабрегас.

Манчестер Јунајтед е далеку од времето кога важеше за еден од најдобрите тимови во Европа, а во периодот кога е доведена во прашање работата на Мајкл Карик, англиските медиуми го гледаат Фабрегас како едно од можните решенија за тренерската позиција на „Олд Трафорд“.

Сепак, Фабрегас јасно стави до знаење дека не сака да учествува во вакви шпекулации и дека неговата целосна концентрација е насочена кон Комо и кон претстојниот натпревар во Лигата на шампионите против англискиот гигант.