Европската урбана иницијатива отвори повик за меѓусебна ревизија на градовите

Европската урбана иницијатива (EUI) отвори нов повик за меѓусебна ревизија (Peer Review) наменет за европските градови, со цел да им помогне во подобрувањето на дизајнот и спроведувањето на нивните стратегии за одржлив урбан развој.

Како што е објавено, повикот е отворен од 1 октомври и ќе трае до 12 ноември 2026 година. Преку овој повик треба да се идентификуваат урбаните власти со стратегии за одржлив урбан развој, финансирани преку член 11 од Европскиот фонд за регионален развој (ERDF), кои ќе бидат предмет на ревизија на настаните за меѓусебна ревизија закажани од март до јули 2027 година.

Според описот на иницијативата, меѓусебната ревизија е активност за градење капацитети што EUI ја нуди за поддршка на европските градови, преку процес на споредбено оценување и меѓусебно учење.

Секоја меѓусебна ревизија вклучува еден „град под ревизија“ како главен корисник, кој работи со претставници од најмногу шест градови кои дејствуваат како „меѓусебни ревизори“ (секундарни корисници), со цел да се решат предизвиците во развојот и спроведувањето на стратегиите.

EUI ги поддржува урбаните средини од сите големини преку иновативни акции, градење капацитети и знаење, развој на политики и комуникација за одржлив урбан развој. Иницијативата, меѓу другото, нуди можности за градовите како двигатели на иновации да ги претворат амбициозните и креативни идеи во пилот-проекти што можат да се тестираат во реални урбани услови.

Во рамките на градењето капацитети, покрај меѓусебните ревизии, EUI организира и размени град-со-град, при што градовите можат да ги посетат другите европски градови за да најдат решенија за своите проблеми. Достапни се и упатства за меѓусебните ревизии и за размените град-со-град, како и прирачник за стратегии за одржлив урбан развој.

За повикот се предвидени и активности за поддршка на пријавувачите, меѓу кои онлајн насоки, семинари за пријавувачи, сесии за прашања и одговори и често поставувани прашања.