Европа пред криза во раното финансирање на стартапи: „Транспортната лента“ на иновациите се кине

Европа се соочува со криза во раната фаза на финансирање на стартапи, предупредува инвестициската компанија Antler во својот најнов извештај за европските основачи. Додека бројот на новоосновани компании во регионот забрзано расте, сè помалку од нив добиваат поддршка од инвеститорите. Ова создава тесно грло што може да ја „изгладне“ следната генерација основачи, пишува Yahoo Finance.

Кристоф Клинк, партнер во Antler и автор на извештајот, објаснува дека вниманието досега беше насочено кон проблемот со финансирање во фазата на раст. Но, според него, поставува клучно прашање: ако ги обединиме сите ресурси и го решиме тој проблем, каде ќе бидеме за три или четири години ако раната фаза не напредува како што треба? Тој нагласува дека денес постојат „два света“ за основачите во раната фаза — или растат експлозивно и лесно собираат капитал, или не растат, па подобро е да најдат начин да станат позитивни во готовинскиот тек и полека да градат моментум.

Извештајот забележува дека бројот на основани компании пораснал за 84 отсто до 2025 година, а вештачката интелигенција ја намалува бариерата за влез. Клинк објаснува дека пред три години, ако не сте биле компјутерски научник или инженер, сте морале да најдете таков пред да го изградите првиот производ, додека денес тој чекор може целосно да се прескокне. Сепак, тој предупредува дека полесниот влез не значи и полесна победа — дел од компаниите ќе достигнат 100.000 долари годишен приход од претплати, но нема да се развијат до 100 милиони.

Според Клинк, фондовите станаа поголеми, а особено американските фондови од прв ред што влегоа во Европа повеќе не се задоволуваат со „еднорог“ како резултат — потребни им се компании вредни десет пати повеќе. Тоа значи дека компании со потенцијал за „еднорог“ може да бидат превидени. Истовремено, зголемената конкуренција го покачува ризикот и очекувањата за принос. Компаниите што не собираат капитал врз основа на раст на приходите, како оние во длабоката технологија и хардверот, собираат врз основа на потекло и репутација на основачите.

Клинк посочува и дека бројот на активни инвеститори опаѓа во последните неколку години, а капиталот е сè поконцентриран во компаниите што избиваат напред. Како последица, „помалку луѓе пукаат повеќе истрели кон исти стартапи“, а за сите останати останува помалку достапен капитал. Тој предупредува дека ако трендот продолжи, „транспортната лента се кине“ и се „согорува една генерација основачи“ што не добиваат инвеститорски интерес и поддршка да се развијат до многу големи резултати — пропуштајќи огромна можност во време кога Европа економската се бори на многу фронтови.