ЕУ со најголем пакет санкции досега: под мерки 1.569 лица и компании од рускиот воено-индустриски комплекс

Советот на Европската Унија денес усвои дополнителни рестриктивни мерки против 1.569 лица и компании од рускиот воен и индустриски комплекс, како одговор на продолжената и ескалирачка агресија на Русија врз Украина, а особено на неодамнешната брутална воена кампања што свесно е насочена кон цивилна инфраструктура и предизвикува тешки страдања на цивилното население. Како што соопшти Европската Комисија, ова е најголемиот поединечен пакет санкции досега договорен на ниво на ЕУ и со него вкупниот број на субјекти под санкцискиот режим за поддршка на територијалниот интегритет на Украина се приближува до 4.600.

Договорениот пакет опфаќа 826 руски компании и 743 лица кои извршуваат функции на извршни директори во тие компании. Денешниот пакет конкретно е насочен кон добавувачите од средно ниво, кои претставуваат „јадро“ на руската воена индустрија, со годишен промет од најмалку 20 милијарди евра и со повеќе од 250.000 вработени.

Мерките се донесени во рамките на европскиот режим на рестриктивни мерки насочен кон дејствија што го поткопуваат или загрозуваат територијалниот интегритет, суверенитетот и независноста на Украина. За субјектите ставени на листата во рамките на овој санкциски режим се применува замрзнување на средствата, а забрането е и обезбедување финансиски средства или економски ресурси, директно или индиректно, за нив или во нивна корист. Дополнително, за физичките лица ставени на листата се применува и забрана за патување во ЕУ.