ЕУ лансира иницијатива за поголема вработеност на жените во Медитеранот

Европската комисија ја претстави новата иницијатива за поттикнување на вработеноста на жените во Медитеранот, чија цел е создавање на 500.000 работни места за жени и зголемување на нивната вработеност за 5 отсто до 2030 година.

Иницијативата ја објави комесарот за Медитеранот, Дубравка Шуица, на настан организиран со агенцијата на Обединетите нации за родова еднаквост и зајакнување на жените (UN Women), во рамките на 81. недела на високо ниво на Генералното собрание на ОН во Њујорк.

„Економското зајакнување на жените не е само прашање на еднаквост — тоа е прашање на отклучување на таленти, поттикнување на раст и создавање на попросперитетни општества низ Медитеранот. Преку Пактот за Медитеранот, оваа амбиција ја претвораме во акција. Оваа иницијатива има за цел да помогне во создавањето на 500.000 работни места за жени и да ја зголеми вработеноста на жените за 5 отсто до 2030 година, инвестирајќи во вештини, претприемништво и можности“, изјави комесарот Шуица.

Според податоците наведени во соопштението, учеството на жените на пазарот на трудот во регионот на Блискиот Исток и Северна Африка повеќе од две децении останува на просечно ниво од околу 20 отсто. Намалувањето на јазот во вработеноста меѓу жените и мажите би можело да го зголеми регионалниот БДП за дури 60 отсто, истовремено поттикнувајќи ја продуктивноста, иновациите и економската отпорност.

Преку Иницијативата за забрзано вработување на жените, ЕУ ќе соработува со UN Women и други партнери за проширување на економските можности за жените, со фокус на вештини, претприемништво и создавање работни места. Иницијативата ќе поддржи реформи за раст предводен од приватниот сектор, ќе ги вклучи бизнисите во проширувањето на вработеноста на жените и ќе развие нови можности за вработување во сектори со силен потенцијал, меѓу кои грижата, зелениот сектор, науката и технологијата.

Ова е еден од многуте проекти во рамките на Пактот за Медитеранот, планот на Комисијата со кој инвестициите во луѓе, вештини и економски можности се ставаат во срцето на посилните односи меѓу ЕУ и нејзините медитерански партнери.

Иницијативата за забрзано вработување на жените се надоврзува на растечките напори за зајакнување на економското учество на жените во регионот. Повеќе од 900 компании ги потпишаа Принципите за зајакнување на жените, додека UN Women и партнерите придонесоа за реформи на 20 закони во арапските држави што ја поддржуваат економската партиципација на жените.

Еднаквоста и зајакнувањето на жените се меѓусекторски приоритети во рамките на Пактот за Медитеранот и составен дел од надворешното дејствување на ЕУ во Блискиот Исток и Северна Африка.