Еквинор предупредува: Британија може да стане „неинвестибилна“ без нови нафтени и гасни полиња

Норвешката државна нафтена компанија Еквинор предупреди дека може да се откаже од понатамошни инвестиции во Обединетото Кралство доколку не бидат одобрени новите нафтени и гасни полиња Роузбенк и Џекдо. Андерс Опедал, првиот човек на компанијата која е делумен сопственик на наоѓалиштата, изјави за Би-Би-Си дека доколку се донесе одлука за отфрлање на новото дупчење, компанијата „ќе мора да заземе цврст став“ за тоа.

„Прашањето ќе биде: дали Обединетото Кралство е инвестибилно во иднина? Се надевам дека нема да дојде до тоа“, рече Опедал. Тој останува уверен дека зборовите на премиерот Енди Барнам за „прагматичен пристап кон нафтата и гасот“ значат дека двата проекти ќе добијат одобрение, но оцени дека сегашната состојба на неизвесност е „непријатна позиција“.

Предупредувањето доаѓа во момент кога владата на Обединетото Кралство треба да одлучи дали конечно ќе даде одобрение за експлоатација на нафта и гас во Роузбенк и Џекдо, и покрај забраната ветена во изборниот манифест на Лабуристите. Од владата порачаа дека секоја одлука ќе ги земе предвид сите релевантни докази.

Растот на цените на енергијата повторно ја отвори дебатата за енергетската безбедност на Обединетото Кралство, чие производство се предвидува да се преполови до 2035 година. Земјата веќе половина од потребите за гас ги покрива од Норвешка, чија влада продолжува да издава нови лиценци за истражување нафта и гас во своите води на Северното Море. Еквинор предвидува дека производството ќе остане на сегашните нивоа до средината на следната деценија.

Опедал нагласи дека Обединетото Кралство може да произведува повеќе сопствена нафта и гас, оценувајќи го тоа како „политички избор“. Тој потсети дека индустријата за нафта и гас во Северното Море започнала на британската страна и дека геологијата е иста од двете страни на границата, при што неколку полиња всушност ја преминуваат.

Роузбенк е најголемото неразвиено нафтено и гасно поле во Обединетото Кралство, сместено во Северниот Атлантик на околу 80 милји северозападно од Шетландските Острови, и се смета дека содржи до 500 милиони барели нафта и гас. Според Опедал, лиценцата за истражување била доделена пред 25 години.

И Роузбенк и Џекдо првично добиле зелено светло од поранешната конзервативна влада, но биле одложени со судска одлука на шкотски суд, откако еколошките групи тврделе дека согласноста е дадена без целосно разгледување на климатските влијанија. По јавната консултација за наоѓалиштата, која заврши во август, конечната одлука сега е во рацете на министерката за енергетика Миата Фанбуле.

Двете полиња ги управува Адура, заедничко вложување меѓу Еквинор и Шел. Компанијата Итака со седиште во Абердин исто така поседува 20 отсто од Роузбенк. Адура претходно изјави дека доколку одобрението дојде наскоро, Џекдо би можел да почне да испорачува гас до британските домови уште оваа зима, бидејќи изградбата е „99 отсто завршена“.

Теса Кан, извршна директорка на организацијата Аплифт, која се залага Обединетото Кралство да се оддалечи од производството на фосилни горива, оцени дека новото дупчење во Роузбенк „нема да ги намали сметките“ и претставува „лош договор за Британија“. Според неа, станува збор претежно за нафта за извоз, која ќе ги збогати Еквинор и норвешката влада, додека Британија останува со високи сметки за енергија и намалена работна сила. Кан додаде дека „климатскиот кредибилитет“ на Лабуристите е исто така на коцка.

Портпарол на владата изјави дека Северното Море останува „витален национален ресурс“ и дека нафтата и гасот ќе продолжат да играат важна улога во енергетскиот систем со децении, паралелно со транзицијата кон чиста енергија за заштита на работните места и справување со климатската криза. Тој додаде дека секоја одлука ќе ги земе предвид сите релевантни докази, вклучително еколошките проценки и јавните изјави добиени за време на консултацијата.