ДЗР откри неправилности кај пет друштва за игри на среќа со удел на Државна лотарија

Државниот завод за ревизија (ДЗР) утврди сериозни слабости во работењето на пет друштва за приредување интернет и електронски игри на среќа во кои Државна лотарија има 51 отсто сопственички удел. Ревизијата, која се однесува на финансиските извештаи и усогласеноста на работењето за 2024 година, откри долгорочни договори, неусогласени парични влогови, недостатоци во трошењето средства и слабости во контролата на приредувањето игри на среќа. Поради утврдените неправилности, ДЗР изразил неповолно мислење за финансиските извештаи и за усогласеноста на активностите и финансиските трансакции со законите и воспоставените политики.

Кај друштвата за приредување интернет игри на среќа, основани во 2023 и 2024 година, ревизорите утврдиле разлики во договорените парични влогови, роковите за нивна уплата и начинот на евидентирање. Во договорите за заедничко вложување биле предвидени влогови од вкупно 2.171.470 евра, кои требало да се уплатат во три рати во период од три години. Сепак, во договорите за основање биле наведени влогови од 771.470 евра, со рок за уплата од една година. За разликите не биле приложени соодветни и веродостојни докази.

Според ДЗР, уплатата на влоговите во рок од три години не е во согласност со Законот за трговските друштва. Дополнително, кај друштвата „Државна лотарија – Моззарт“ и „Државна лотарија – Везув“ неуплатениот дел од договорените влогови не бил евидентиран во трговските книги. Кај „Везув“, од договорениот влог од 2.171.470 евра, до ревизијата биле уплатени само девет милиони денари, односно околу 146.000 евра.

Слабости се утврдени и при набавките на софтвер, интернет-платформи со играчки содржини, како и услуги за одржување и техничка поддршка на терминали за видеолотарија. Постапките биле спроведувани врз основа на јавни повици и интерни правилници, без примена на Законот за јавните набавки. Во најголем дел од постапките била доставена само една понуда, а биле склучувани договори со рок на важење од 15 години кај дел од друштвата.

Ревизијата на ДЗР ги опфатила финансиските извештаи и усогласеноста на работењето на овие пет друштва за 2024 година, при што биле констатирани системски пропусти во евидентирањето на влоговите, во постапките за набавки и во контролата на приредувањето на игрите на среќа. Неповолното мислење на ДЗР за финансиските извештаи и за усогласеноста на активностите и финансиските трансакции со законите и воспоставените политики укажува на потребата од итни корекции во работењето на овие друштва.