Џио Платформс на Мукеш Амбани со историско IPO собира до 3,2 милијарди долари

Џио Платформс, најголемиот индиски телекомуникациски оператор, планира да собере до 302 милијарди рупии, односно околу 3,2 милијарди долари, преку првична јавна понуда на акции (IPO). Продажбата на акции ќе се одвива од 21 до 23 октомври, а компанијата ќе понуди 270 милиона акции по цена меѓу 1.065 и 1.119 рупии за една акција. Ова го соопшти Релајанс Индастрис, матичната компанија на телекомуникацискиот оператор, во поднесок до берзата.

Според податоците од изворот, оваа продажба на акции ќе биде најголемата досега во Индија изразена во рупии, но втора најголема во долари, веднаш по IPO-то на Хјундаи Моторс со кое во 2024 година беа собрани 3,3 милијарди долари. Индиската пазарна аналитичка куќа Прајм Датабејз проценуваше дека Џио ќе собере околу 377 милијарди рупии преку своето IPO. По највисоката цена од понудениот опсег, Џио Платформс се вреднува на околу 108 милијарди долари, што е значително пониско од претходно очекуваното.

Според проспектот за IPO-то, ниту Мета ниту Гугл нема да го продадат својот удел во компанијата. Иако Џио Платформс се позиционира како технолошка компанија, а не само како традиционален давател на комунални услуги, инвеститорите изгледаат неубедени. „Џио Платформс во својата основа е телекомуникациска компанија“, изјави Деван Чокши, управен директор на ДРЧокши Финсерв со седиште во Мумбаи, за CNBC. Тој додаде дека, иако забавните или гејминг апликации во сопственост на Џио Платформс го зголемуваат користењето на податоци, компанијата приходите главно ги остварува од продажба на интернет податоци.

Џио е најголемата телекомуникациска компанија во Индија со над половина милион претплатници, но по сегашната цена ќе биде вреднувана помалку од Барти Аиртел, вториот најголем играч во земјата. Според податоците на LSEG, пазарната капитализација на Барти Аиртел изнесува 117,5 милијарди долари. Џио Платформс, исто така, планира да воведе сателитски комуникациски услуги во Индија, што ја става во центарот на спорот меѓу сопственикот Амбани и Илон Маск од Старлинк. Според извештаите, Џио има намера да постави мрежа од околу 1.600 сателити во ниска орбита и 23 земски станици за проширување на поврзаноста низ Индија. Маск минатата сабота го обвини Амбани дека го блокира лансирањето на Старлинк во Индија за да го задржи своето „монополско искористување“ на индискиот пазар.