Директорот на MongoDB преминува во Мета, акциите на компанијата паднаа 17 отсто

Извршниот директор на MongoDB, Чирантан „Си-Џеј“ Десаи, ја напушта компанијата за бази на податоци и се приклучува на Meta Platforms како главен директор за корпоративна платформа. Според соопштението, Десаи ќе одговара директно пред извршниот директор на Мета, Марк Цукерберг.

Десаи ќе раководи со новата деловна единица на технолошката компанија наречена Meta Enterprise Platform, чија цел е да им служи на бизнисите. Во соопштението се наведува дека фокусот првично ќе биде ставен на тоа целосниот технолошки стек на компанијата да им биде достапен на бизнисите и на развивачите, со цел да им помогне да растат.

Веста предизвика остар пад на акциите на MongoDB, кои загубија 17 отсто од вредноста. Десаи помина помалку од една година на чело на MongoDB, откако ја презеде функцијата во ноември 2025 година од Дев Итичерија, кој беше извршен директор 11 години.

Одборот на директори на MongoDB го именуваше Итичерија за привремен претседател и извршен директор. Компанијата засега не соопшти дополнителни детали за постапката за избор на постојан наследник на Десаи.