Димитриеска-Кочоска: Одговорноста за надзорот над банките е на Народната банка, не на Министерството за финансии

Министерката за финансии Гордана Димитриеска-Кочоска на денешната надзорна расправа пред собраниската Комисија за финансирање и буџет изјави дека во случајот со Алта банка Битола мора да се прави јасна разлика меѓу фактите и политичките интерпретации, меѓу документите и претпоставките, како и меѓу институционалната одговорност и политичките конструкции. Таа пред пратениците порача дека во изминатите денови во јавноста биле изнесени бројни тврдења и обвинувања за наводна вмешаност на Министерството за финансии во случајот, но оцени дека одговорноста треба да се утврдува врз основа на законите, документите и конкретните постапки, а не преку политички изјави.

Според министерката, институционалната одговорност не се утврдува според гласноста на обвинувањата, туку врз основа на законските надлежности и доказите. Димитриеска-Кочоска нагласи дека Министерството за финансии е подготвено да одговори на сите прашања што се во рамките на неговите законски надлежности и да ги презентира релевантните информации и документи. Таа оцени дека надзорната расправа е можност клучните прашања за Алта банка Битола да бидат отворени и фактите транспарентно да им бидат претставени на пратениците и на јавноста.

Осврнувајќи се на институционалните надлежности, министерката посочи дека Министерството за финансии и Народната банка имаат различни, законски дефинирани улоги во финансискиот систем. Како што објасни, Министерството за финансии е одговорно за управувањето со јавните финансии, за водењето на фискалната политика, за фискалната стабилност и за одржливоста на јавниот долг, како и за обезбедувањето предвидливо и сигурно финансирање на буџетските обврски.

Во областа на финансискиот систем, Министерството за финансии подготвува и предлага законска регулатива, вклучително и за банкарскиот сектор, учествува во креирањето политики и ги оценува макроекономските состојби и потенцијалните фискални последици од евентуални финансиски кризи. Од друга страна, како што нагласи Димитриеска-Кочоска, надзорот над банките, издавањето и одземањето дозволи за работа, оценувањето на исполнетоста на условите за стекнување квалификувано учество, како и преземањето надзорни и корективни мерки, се во надлежност на Народната банка како независна институција.

Министерката за финансии нагласи дека банкарскиот систем е еден од најстрого регулираните сегменти, што, како што посочи, дополнително ја потврдува поделбата на надлежностите меѓу двете институции. Според неа, токму затоа е важно да не се поистоветуваат улогите на Министерството за финансии и на Народната банка, бидејќи секоја од нив делува во рамките на своите законски овластувања.

Надзорната расправа пред Комисијата за финансирање и буџет беше свикана по случајот со Алта банка Битола, а министерката пред пратениците ги презентираше и документите и информациите што се во доменот на нејзиното министерство. Таа изрази очекување дека расправата ќе придонесе клучните прашања да бидат отворени и фактите транспарентно да им бидат претставени и на пратениците и на пошироката јавност, наместо да се води дебата врз основа на претпоставки и политички интерпретации.