Дејли телеграф“ укинува 100 работни места — новите сопственици ветат пресврт во глобална медиумска компанија водена од вештачка интелигенција

Новите сопственици на британскиот весник „Дејли телеграф“ укинаа околу 100 работни места, соопштувајќи им на вработените дека изданието ќе се трансформира од весник во „глобална, премиум медиумска и информативна компанија водена од вештачка интелигенција“. Како што пренесува „Гардијан“, дел од вработените биле информирани за отпуштањата во четвртокот, а други добиле телефонски повици и електронска пошта во петокот наутро.

На состанокот за сите вработени и во електронската порака во петокот, извршната директорка Каролин Хулшоф Пол им порачала дека весникот сè повеќе ќе се потпира на технологија, податоци и вештачка интелигенција за да го „преосмисли искуството на читателот“.

Пол навела и дека компанијата ќе се насочи кон раст на меѓународната публика, „особено во областите на надворешната политика, одбраната и бизнисот“. Таа објаснила дека за време на долгиот процес на продажба „Телеграф имал ограничена можност да инвестира, да се приспособува и да се движи со темпото што го бара пазарот“, додавајќи дека „медиумскиот свет и технологијата се сменија со извонредна брзина“.

„Нашата амбиција е да го трансформираме „Телеграф“ од водечки британски весник во глобална, премиум медиумска и информативна компанија водена од вештачка интелигенција — изградена врз доверливо новинарство, директни односи со нашата публика и експертиза што нè издвојува“, рекла Пол. Според неа, за да се постигне таа цел, организацијата „ќе ја користи вештачката интелигенција со самодоверба, додека го зајакнува она што технологијата не може да го замени: судот, оригиналноста, храброста и довербата“.

Портпарол на „Телеграф медиа груп“ ги повторил зборовите на Пол, додавајќи: „Денес започнува формален процес на консултации. Ова се тешки одлуки за кои веруваме дека се неопходни за иднината на бизнисот“. Весникот беше купен во јуни од европската медиумска група „Аксел Шпрингер“ за 575 милиони фунти, со што завршија три мачни години за изданието и неговите вработени, во кои потенцијалните сопственици беа блокирани, пропаѓаа или се соочуваа со жестоко внатрешно противење. Со купувањето, „Телеграф“ се приклучи на групацијата медиумски брендови во која се и германските изданија „Билд“ и „Ди велт“, како и дигиталните портали „Политико“ и „Бизнис инсајдер“.

Извршниот директор и контролен сопственик на „Аксел Шпрингер“, Матијас Депфнер, изјавил дека има намера да инвестира во „Телеграф“ за да го направи „водечки центар-десен медиум во англиското говорно подрачје“. Сепак, големи отпуштања во весникот беа очекувани, имајќи ја предвид внатрешната консултација со вработените во последните недели за иднината на бизнисот. Извор од внатрешноста на „Телеграф“ изјавил за „Гардијан“ дека атмосферата во редакцијата е „како во мртовечница“, а дел од постарите вработени со солзи им соопштувале на колегите за нивната судбина.