Common Sense Media: „ChatGPT за тинејџери“ не е побезбеден од претходната верзија

Непрофитната организација за оценување медиуми Common Sense Media го објави својот извештај за „ChatGPT за тинејџери“, алатката што OpenAI ја лансираше во август со „посилни вградени безбедносни заштити“ наменета за корисници на возраст од 13 до 17 години. Според оценката на организацијата, платформата добила ниво на „неприфатлив ризик“. Институтот за безбедност на млади во рамки на Common Sense Media тестирал повеќе од 4.000 барања пред и по лансирањето на производот за тинејџери.

„Најдовме многу малку докази дека оваа нова верзија на ChatGPT е побезбедна од претходната верзија“ за лица под 18 години, изјави Роби Торни, раководител за вештачка интелигенција и дигитални оценки во Common Sense Media и поранешен наставник. Според него, алатки како Grok и Meta AI исто така добиле ниво на „неприфатилив ризик“.

Од OpenAI реагираа на наодите. Според соопштение на портпарол на компанијата, тие ја поддржуваат „ригорозната независна евалуација“, но додаваат дека нивниот преглед на методологијата на Common Sense Media покажува оти „најголемиот дел од нивното тестирање можеби започнал и завршил пред целосно активирање на родителската контрола, што ги прави нивните наоди неточни“.

Торни, сепак, тврди дека пред почетокот на тестирањето Common Sense Media потврдила со OpenAI дека функциите, како известувањата за нарушувања во исхраната, се целосно лансирани. „За една од функциите што ја оценувавме — родителските известувања — OpenAI откри по нашите тестови дека на нивните системи им требаат неколку часа за активирање на новоповрзани сметки“, рече тој, додавајќи дека дел од тест-сметките биле поврзани во тој период, но други биле поврзани значително подолго и сепак не дале известувања.

И покрај критиките, Торни оценува дека во OpenAI има луѓе кои „длабоко се грижат за искуството што тинејџерите го имаат со овој производ“ и работат напорно да го направат побезбеден. Сепак, тој смета дека постои тензија меѓу различните интереси на компанијата.