Circle и Tether замрзнаа околу 1,8 милијарди долари поради потенцијален безбедносен проблем на Binance

Компаниите Circle Internet Group и Tether замрзнаа средства во вредност од околу 1,8 милијарди долари поврзани со потенцијален хак на крипто берзата Binance. Најголемата крипто берза во светот по дневен обем на тргување досега не потврдила експлицитно дека претрпела напад.

Во објава на социјалните мрежи, Binance соопшти дека ја истражува „потенцијалната безбедносна грижа“ на својата платформа за тргување. „Нашите тимови се свесни за извештаите за потенцијален безбедносен проблем и активно истражуваат“, изјави портпарол на Binance. „Бидете сигурни дека средствата на корисниците се целосно безбедни. Нашите безбедносни тимови со итност ги прегледуваат сите релевантни информации и ќе објавуваме ажурирања преку официјалните канали на Binance штом имаме потврдени информации.

Извршниот директор на Circle, Џереми Алер, во четвртокот навечер во објава на социјалните мрежи соопшти дека компанијата замрзнала повеќе од 800 милиони во стабилната криптовалута USD Coin поврзани со инцидентот. Извршниот директор на Tether, издавачот на стабилната криптовалута USDT, Паоло Ардоино, исто така во соопштение објавено на X наведе дека неговата компанија замрзнала повеќе од 1,5 милијарди од својата стабилна криптовалута што можеби се поврзани со потенцијален безбедносен пропуст.

По изјавите на директорите, биткоинот — најследената криптовалута во светот — падна за повеќе од 3 отсто и се спушти под 80.000 долари. Акциите на Circle, пак, паднаа за околу 5 отсто во тргувањето по затворањето на пазарите во четвртокот.

Од компанијата Circle потсетуваат дека станува збор за информација во развој и дека ќе бидат објавени дополнителни детали штом бидат достапни.