Бунт против дата-центрите: новата тема што може да ги реши изборите во САД

Американски сенатор, кој само пред една година не обрнувал големо внимание на дата-центрите, денес одржува редовни состаноци со својот тим за да го следи нивното влијание и работи на ново законодавство чија цел е да ја ограничи нивната брза експанзија низ земјата. Овој пресврт од 180 степени, како што за BBC изјавил негов советник, е поттикнат речиси целосно од растечкиот бран на јавно незадоволство поради кој политичарите низ целата земја се обидуваат да го следат темпото.

Јавното расположение се сврте против ширењето на дата-центрите — големите магацини во кои се сместува процесорската моќ потребна за интернет-активностите. Наполнети со редови и редови компјутерски чипови, високи понекогаш и по седум стапки, тие веќе не се само инфраструктура за интернетот. Станаа физичко олицетворение на експлозивниот раст на технологијата за вештачка интелигенција и на различните стравови што луѓето ги поврзуваат со неа.

Жителката на Индијана, Анхелита Соријано, за BBC изјави дека не сака да биде „заморче“ во овој процес. Нов дата-центар на Amazon се гради директно преку пат од нејзиниот дом. Кога ќе биде завршен, објектот со 26 згради ќе зафаќа повеќе од една квадратна милја во нејзиното соседство и ќе одржува 782 дизел-генератори. Некои дата-центри се уште поголеми — во Охајо, заеднички потфат на OpenAI, Nvidia, SB Energy и американското Министерство за енергетика треба да изгради комплекс што ќе се протега на околу шест квадратни милји, колку што изнесува големината на повеќето општини во САД. Според извештај на Pew Research Center, во САД моментално работат околу 3.000 дата-центри, а таа бројка потенцијално би можела да се удвои во следните неколку години.

Дата-центрите се градат според многу локални правила и дозволи, што значи дека федералните законодавци, како сенаторите, имаат мал збор во процесот. Сепак, отпорот стана толку силен и толку брз што одеднаш политичарите на сите нивоа се практично принудени да заземат став. Според советничката за политики за вештачка интелигенција, Клои Аутио, ова не е само прашање на левицата, туку има огромен отпор и меѓу конзервативците, а секој што ќе артикулира јасна позиција и ќе остане на неа, во која било партија, може да има корист. Нејзината анализа ја потврдил и советникот на сенаторот што работи на законодавството за дата-центри, кој вели дека има јасна потреба од политика што тие сакаат да ја исполнат и дека граѓаните ги гледаат последиците и не им се допаѓаат.

Тоа многумина на Капитол Хил, дури и републиканци, ги стави во директен судир со претседателот Доналд Трамп, кој го поддржува неограничениот раст на технологијата за вештачка интелигенција. Трамп отпорот против дата-центрите го нарече „болна завера“ и рече дека луѓето и градовите што се обидуваат да ги спречат се „назадни и сиромашни“. Неговиот гнев демократските политичари го користат како предност за да привлечат гласови од незадоволни или неопределени граѓани на изборите.

Според истражувањето на Data Center Watch, во првите неколку месеци од оваа година, бројот на граѓански групи што се организираат против дата-центри повеќе од двојно се зголемил, на 833, и се појавиле речиси во секоја американска сојузна држава. Стефани Малдонадо, политичка директорка на LUCHA, граѓанска организација од Аризона, отпорот против дата-центрите го опиша како „приказна за Давид и Голијат“ што започнала пред неколку години, додавајќи дека луѓето биле подготвени да го запре тоа, а сега се лути. Новото национално истражување покажува дека регулирањето на вештачката интелигенција и дата-центрите се меѓу најважните теми за гласачите во овој изборен циклус, по војната со Иран и различните аспекти на економијата. Поборниците за изградба на дата-центри често тврдат дека проектите ќе создадат повеќе и подобро платени локални работни места, но неодамнешното истражување на Brookings Institution, непартизанска група за истражување на политики, откри дека нов дата-центар создава меѓу 100 и 200 локални работни места.