Британските банки најголеми финансиери на јагленот во Европа, покажува студија

Банките со седиште во Обединетото Кралство се најголемите европски финансиски поддржувачи на глобалната индустрија за јаглен, откако во изминатите четири години обезбедиле 8,3 милијарди долари за ова фосилно гориво, покажува истражување на германската организација за животна средина и човекови права Urgewald, пренесува The Guardian.

Според студијата, британските банки одржале финансирање на јаглен во вредност од 8,3 милијарди долари од самитот COP26 во Глазгов во 2021 година, кога светските лидери се обврзаа на „постепено намалување“ на употребата на јаглен. За споредба, германските банки во истиот период обезбедиле 4,9 милијарди долари, а француските 3,4 милијарди долари.

Сумите што ги дале британските банки во најголема мера ги предводат Барклис и Ејч-Ес-Би-Си, кои го зголемиле финансирањето на јаглен меѓу 2022 и 2025 година, и покрај нивните високопрофилни климатски обврски и цели за нето нула емисии. Истражувањето покажува дека финансирањето на јаглен од страна на Барклис пораснало за 34 отсто, од приближно 1,2 милијарди долари во 2022 година на 1,6 милијарди долари во 2025 година, додека кај Ејч-Ес-Би-Си повеќе од двојно се зголемило, од 200 милиони на 414 милиони долари.

Директорката на Urgewald, Хефа Шикинг, изјави дека Барклис и Ејч-Ес-Би-Си треба да објаснат зошто нивното финансирање се движи во спротивна насока од остатокот од Европа. Од Ејч-Ес-Би-Си возвратија дека банката се обврзала на постепено укинување на финансирањето за термоелектрани и рударство на јаглен до 2030 година на пазарите на ЕУ и ОЕЦД, а до 2040 година на другите пазари, наведувајќи дека финансираните емисии од рударство на јаглен паднале за 94 отсто меѓу 2020 и 2024 година. Од Барклис пак посочија дека многу од компаниите споменати во извештајот се „диверзифицирани енергетски или рударски компании“ и дека банката не финансира компании што остваруваат повеќе од 30 отсто од приходите од рударство или производство на енергија од јаглен.

Иако некои британски банки го намалиле финансирањето на јаглен, вкупните финансиски текови од банките со седиште во Британија кон синџирот на вредност на јагленот пораснале за 17 отсто во наведениот период, наспроти намалување од 46 отсто кај банките од ЕУ. Глобално, финансирањето на јаглен од банките останало приближно исто меѓу 2022 и 2025 година, со просек од околу 117 милијарди долари годишно. Притоа, кинеските банки учествувале со 62 отсто од глобалното финансирање на јаглен, обезбедувајќи 289 милијарди долари или раст од 8 отсто, американските банки дале 67 милијарди долари со раст од 23 отсто, а индонезиските го зголемиле финансирањето за 64 отсто, од 1,4 милијарди на 2,3 милијарди долари. Банките во ЕУ, Тајван, Малезија и Тајланд значително го намалиле финансирањето на јаглен.