Брегалница со гол во 92. минута го шокираше Арсими во драма со седум гола

Брегалница приреди вистинска драма на гостувањето кај Арсими и славеше со 3-4, откако до победнички гол стигна во 92. минута. Возбудливиот дуел од 11. коло во Првата македонска фудбалска лига, одигран во Гостивар, донесе седум погодоци, голем пресврт и драматичен финиш во кој штипјани се радуваа на првата гостинска победа сезонава.

Почетокот не навестуваше ваква голеада, но натпреварот се разгоре по дваесеттата минута. Во 22. минута Рамадани се обиде од далечина, Филевски го одбрани ударот, но топката стигна до Лорик Каба, кој ја затресе мрежата за водство на Арсими од 1-0.

Сепак, домаќините не успеаја долго да ја задржат предноста. Брегалница возврати во 30. минута преку Стефан Коцев, кој израмни на 1-1, а во 40. минута Иван Глигоров донесе целосен пресврт и водство од 1-2 за гостите. Штипјани со предност заминаа на паузата.

Вториот дел започна во ист ритам, а Брегалница во 52. минута ја зголеми предноста. По корнер од десната страна, Виктор Велкоски беше највисок во скокот и со неодбранлив удар со глава погоди за 1-3.

Но, Арсими не се предаде. Домаќините тргнаа офанзивно и во 64. минута успеаја да се вратат во натпреварот. Шпанецот Маркел Гоми намали на 2-3 по асистенција на Мухарем Мислими, а само пет минути подоцна Аљбин Рамадани го постигна својот втор гол сезонава за 3-3 и ерупција од радост на трибините.

Арсими имаше можност и целосно да го сврти резултатот. Гаје се обиде да го лобува голманот Филевски, но Рајков интервенираше речиси од самата гол-линија и спречи нов погодок на домашниот тим.

По шокот од двата брзи гола, Брегалница постепено се стабилизираше и се обиде повторно да ја преземе иницијативата. Лемос се закани, Глигоров упати удар кој беше блокиран, но во продолжението недостасуваа вистински можности за нова промена на резултатот.

Кога изгледаше дека двете екипи ќе мора да се задоволат со реми, Брегалница зададе решавачки удар. Нововлезениот Натаниел погоди во 92. минута за конечни 4-3 и огромна радост на гостинскиот тим.

Со овој триумф Брегалница стигна до 13 бода и се искачи на седмото место на табелата, со три бода повеќе од Арсими. Тимот од Чегране, пак, останува на работ од опасната зона.