Бразил избегна пораз во 95. минута – Рајан донесе реми против Австралија

Фудбалската репрезентација на Бразил успеа да избегне пораз против Австралија во пријателски натпревар одигран во Квинсленд, откако напаѓачот Рајан постигна гол во петтата минута од судиското продолжение за конечни 1:1. Со тоа, избраниците на селекторот Карло Анчелоти останаа непоразени, но и овој пат прикажаа неубедлива игра, па дури беа и на работ на пораз кој го избегнаа во самиот финиш.

Австралија поведе во 23. минута со мајсторски слободен удар на Нестори Иранкунда, фудбалер на Спортинг од Лисабон. Иранкунда, кој е роден пред 20 години во Танзанија, совршено го префрли „ѕидот“ на Бразил и не му остави никаква можност на голманот Уго Соуса да реагира. Голгетерот моментот го прослави со салто, во стилот на легендарниот Обафеми Мартинс.

До крајот на натпреварот „кенгурите“ не успеаја да ја сочуваат предноста, иако беа многу блиску до голема победа, која ќе беше нивна втора досега над Бразил. Првата победа Австралија ја оствари во 2001 година на Купот на конфедерации. Во критичните моменти за Австралија херој беше голманот Бич, кој неколкупати ги спаси своите соиграчи, но на крајот бедемот на Австралија не издржа.

Бразил се обидуваше да најде пат до мрежата на „Сокерос“ преку Ендрик, Естевао, Винисиус и моментално најдобриот меѓу нив, Рафиња. Сепак, ниту еден од гореспоменатиот квартет не успеа да го совлада голманот на Австралија. Анчелоти го внесе Рајан во игра во 76. минута наместо Естевао, а токму тој го постави конечниот резултат со удар со глава во 95. минута. Набргу потоа, судијата означи крај на натпреварот.

По сè што се случуваше на теренот, нерешениот резултат е најреален исход од овој пријателски дуел. Бразил и Австралија ќе одиграат уште еден натпревар за четири дена во Бризбејн, што ќе биде нова можност за тимот на Анчелоти да го подобри впечатокот и да прикаже поубедлива игра.