Божиновска: Градиме нови гасни врски, енергетската мрежа ја зајакнуваме со проверливи резултати

Изградбата на гасните интерконектори со Грција и Србија, инвестициите во електропреносната мрежа, поврзувањето со Албанија и поддршката за ранливите домаќинства се меѓу клучните активности на Министерството за енергетика, рударство и минерални суровини, истакна министерката Сања Божиновска во интервју за МИА. Таа порача дека паралелно со инфраструктурните проекти се воспоставуваат нови правила за инвестирање, се планираат идните производни капацитети и се зајакнува регионалната соработка, со цел посигурно снабдување, попредвидливи услови за стопанството и помош за граѓаните на кои енергетските трошоци им претставуваат најголем товар.

Божиновска информираше дека на македонската делница од гасниот интерконектор со Грција досега се заварени околу 30 од вкупно 67 километри. Завршувањето на работите е планирано за 2027 година, а почетниот капацитет на врската ќе изнесува 1,5 милијарди кубни метри гас годишно. Министерката нагласи дека по заварувањето следуваат дополнителни градежни, технички и испитни активности, поради што внимателно се следи динамиката на реализација на проектот.

Во јули, како што посочи таа, претставници на Министерството, на НОМАГАС и на грчкиот оператор ДЕСФА извршиле заеднички увид на трасата, со цел навремено решавање на проблемите и усогласување на работите од двете страни на границата. За македонскиот дел од интерконекторот со Србија е потпишан договор за проектирање и изградба вреден 29,4 милиони евра. Предвидена е делница од 22,4 километри, со двонасочен проток и капацитет од 1,4 милијарди кубни метри годишно.

Според министерката, овие проекти треба да ја намалат зависноста од една влезна гасна врска, да овозможат пристап до повеќе извори, вклучително и до терминалите за течен природен гас преку грчкиот систем, и да отворат можност Македонија да учествува во транзитот на гас. Во септември, во Солун, било формализирано и приклучувањето кон Вертикалниот гасен коридор, со што Македонија и Србија стануваат дел од поширока рамка што ги поврзува гасните системи на девет држави.

Паралелно со инфраструктурата, се работи на воспоставување оператор на пазарот на природен гас преку МЕМО. Новите интерконектори се планираат и со подготвеност за иден транспорт на водород, а во јули била завршена првата сеопфатна национална Водородна студија, со поддршка од ЕУ преку ИПА II и Инвестициската рамка за Западен Балкан.