Боинг“ пред инвеститорите: колку брзо може да го забрза производството на авиони

„Боинг“ во вторник пред отворањето на пазарот ќе ги објави резултатите за третиот квартал и ќе ги информира инвеститорите за плановите за зголемување на производството на авиони во наредните месеци. Вниманието на Волстрит е насочено кон тоа колку брзо компанијата може да го забрза производството, вклучително и на најпродаваниот модел 737 Max, откако со години се соочуваше со кризи во безбедноста и во производството.

Аналитичарите според консензус-проценките на LSEG очекуваат „Боинг“ да пријави загуба од 21 цент по акција и приходи од 23,84 милијарди долари. Волстрит очекува компанијата да прикаже помала загуба од минатата година, бидејќи испорачува повеќе авиони на авиокомпаниите и на другите клиенти. Во истиот период лани „Боинг“ имаше нето-загуба од 5,34 милијарди долари.

Извршниот директор Кели Ортберг минатиот месец им изјави на инвеститорите дека на производството му треба „малку подолго“ од очекуваното за да се стабилизира и дека компанијата очекува да го зголеми производството на авионите следната година. „Боинг“ во моментов произведува околу 47 авиони 737 Max месечно, но има цел за повеќе. Производството и испораките на авиони се клучни за закрепнувањето на компанијата, бидејќи најголемиот дел од цената на авионот се плаќа кога клиентот ќе го прими.

Производителот неодамна забележа и неколку успеси. Американската Федерална авијациска администрација минатата недела го одобри 737 Max 10, најголемиот во семејството Max. Тоа следеше по одобрувањето на 737 Max 7 во август и ги означи последните сертификации за оваа линија авиони.

Инвеститорите ќе ја следат и телефонската конференција за резултатите, која „Боинг“ ќе ја одржи во 10:30 часот по источно американско време.