Битиќи го праша Јанкуловски како Владата ќе им помогне на граѓаните откако го одби предлогот за минимална плата од 600 евра
Автор: Редакција на FinPortal.mk ·
Пратеникот на СДСМ, Фатмир Битиќи, на денешната собраниска седница за опозициски пратенички прашања побара од претставникот на Владата конкретен одговор за тоа како ќе им се помогне на граѓаните откако беше одбиен предлогот за минимална плата од 600 евра. Како што пренесува Скопје1, во отсуство на министерката за финансии Гордана Димитриеска-Кочоска, Битиќи му се обрати на заменик-министерот за финансии Николче Јанкуловски, прашувајќи каква финансиска алтернатива предвидува Владата за да можат барем две минимални плати да ги покријат основните животни трошоци. Според Битиќи, додека Владата ја одбива иницијативата на СДСМ за повисока минимална плата и ја претставува својата пресметка на потрошувачката кошница, граѓаните секој месец се соочуваат со сè поголем јаз меѓу примањата и трошоците за живот. Тој се повика на податоците за синдикалната минимална кошница, кои, како што рече, покажуваат дека куповната моќ на граѓаните значително се влошила. Во ноември 2023 година, за покривање на кошницата биле потребни 2,2 минимални плати, додека во септември 2026 година се потребни 2,7 плати, односно 3,26 минимални плати доколку се вклучи и киријата. „Септемвриската кошница од 69.432 денари бара 2,7 минимални плати од 26.046 денари, а со кирија таа бара 3,26 минимални плати. Значи, две минимални плати оставаат недостиг од 17.340 денари месечно за покривање на основните трошоци, и тоа без киријата. Само храната и пијалаците чинат 25.259 денари, односно 97% од една минимална плата“, рече Битиќи. Тој предупреди дека забавувањето на инфлацијата не значи и поевтинување на животот, ниту, пак, враќање на претходно изгубената куповна моќ. Според него, цените на храната продолжуваат да растат, а последиците најсилно ги чувствуваат домаќинствата со најниски приходи. Битиќи посочи дека во 2025 година храната поскапела за 5,2 отсто, што е за 1,1 процентен поен повеќе од тогашната општа инфлација од 4,1 отсто. Според изнесените податоци во Собранието, во септември годинава инфлацијата изнес