Без „банката на мама и тато“: Тројца дваесетгодишници раскажуваат како се снаоѓаат сами — 22.9.2026

Купувањето дом или дури и преселбата во изнајмен стан е сè понеостварлив сон за многу млади луѓе. Ова лето, редакцијата „Your Voice“ на BBC откри дека повеќе од 40 отсто од 25-годишниците живеат со своите родители. Десетици млади луѓе изјавиле дека мора да се потпираат на таканаречената „банка на мама и тато“ за да ги покријат киријата, сметките и другите трошоци за живот. Но што се случува кога не можеш да сметаш на помош од семејството? „Citizens Advice“ предупредува дека сè поголем број луѓе не можат да си дозволат основни потреби како кирија и храна без родителска поддршка. Три жени раскажаа за BBC како се снаоѓаат во животот без таа сигурносна мрежа.

Елеанор Бел, 23-годишна девојка од Источен Рајдинг Јоркшир, има диплома со највисока оценка, но сè уште не може да најде работа. Таа била сместена во згрижување на 10-годишна возраст. Напорно учела и дипломирала на Универзитетот во Централен Ланкашир. По дипломирањето пред две години, мислела дека условите ќе се изедначат, но тоа не се случило. Елеанор вели дека аплицирала за повеќе работи отколку што може да изброи и имала неколку неуспешни интервјуа. Моментално живее во домот на своето момче надвор од Пенистон во Јужен Јоркшир, што помага со трошоците, но руралната локација дополнително го отежнува барањето работа за некој без возачка дозвола. „Знам многу луѓе кои добиле работа затоа што нивниот татко или мајка работеле таму претходно“, вели таа. Официјалните бројки покажуваат дека 39 отсто од младите на возраст од 19 до 21 година кои излегле од згрижување во Англија не се во образование, вработување или обука, наспроти околу 13 отсто од младите вкупно. „Сакам да бидам независна, а кога ќе дојдеш до вакво нешто, тоа е како да удриш во ѕид“, изјави Елеанор за BBC.

Во Сандерленд, 24-годишната Сем Барет е огорчена што нејзините врсници имаат финансиска резерва што не е достапна за неа. Таа го напуштила постојаното работно место во угостителството за да се грижи за мајка си и хонорарно студира здравствена и социјална нега, но вели дека надоместокот за нега и универзалниот кредит не ги покриваат нејзините главни трошоци. „Не купувам никакви луксузи, ретко правам нешто забавно“, вели таа. Мајка помага финансиски кога може, но парите не се доволни. „Секогаш ми изгледало малку неправедно додека растев и гледав други луѓе во огромна предност во споредба со мене. Како многу родители да велат: ‘еве пари за часови по возење, и еве ти го твојот автомобил‘, а јас не можам едноставно да го сторам тоа“, раскажува Сем. Таа е лута што нема поголем надоместок за негувателите како неа. „Заштедувам пари на владата со тоа што се грижам за мајка ми. Владата не прави ништо за да ти помогне, практично ти вели само задолжи се.

Во неодамнешно истражување на повеќе од 5.500 луѓе, нарачано од „Citizens Advice“, 36 отсто од возрасните изјавиле дека заостануваат со барем една сметка, но кај оние во дваесеттите години тој процент се искачува на 57 отсто. Езѓи Полат е една од нив. Кога 23-годишната девојка од Ремзи во Кембриџшир ја загубила работата пред една година, брзо заостанала со киријата и сметките, а нејзините долгови се искачиле на околу 4.000 фунти, по што се обратила за помош до „Citizens Advice“.