Белата куќа им забрани на „Мајкрософт“ и уште седум технолошки компании да вработуваат странски кадри преку визната програма H1B

Белата куќа им забрани на „Мајкрософт“ и на уште неколку технолошки компании да вработуваат висококвалификувани странски работници на постојана основа преку широко користената визна програма H1B. Американскиот потпретседател Џеј Ди Венс во четвртокот го обвини „Мајкрософт“, заедно со други компании, дека вршат измама преку користење на визната програма H1B и поврзаниот процес со кој работниците од странство стануваат постојани жители на САД.

Венс тврдеше дека „Мајкрософт“, една од највредните компании во САД, ефективно ги заменува американските работници со „странски слуги под договор“. Тој го образложи ваквиот израз со фактот дека, доколку бидат отпуштени од компанијата што им го спонзорирала визумот, таквите работници „мора да ја напуштат“ земјата. Обично таквиот работник има рок од 60 дена во таа ситуација, а минатиот месец американската влада предложи целосно укинување на тој рок.

Американската влада нема да обработува нови или во тек апликации од Програмата за постојана работна сертификација (PERM) од „Мајкрософт“ и од седумте други компании, изјави министерот за труд Кит Сондерлинг на истиот настан. Според него, компании како „Мајкрософт“, како и американските универзитети, се претвориле во „фабрики за визи“ што ја „поплавуваат“ САД со странски работници.

Од „Мајкрософт“ одговорија дека најголемиот дел од апликациите за виза H1B поднесени во последната финансиска година се однесувале на веќе вработени работници, кои добиваат иста плата како локалниот персонал. Портпаролка на компанијата за BBC изјави дека „огромното мнозинство вработени на „Мајкрософт“ во САД се Американци“, а компанијата вработува повеќе од 200.000 луѓе ширум светот. Таа додаде дека 80 отсто од апликациите за H1B поднесени во последната фискална година се однесувале на постоечки вработени, а не на нови вработувања, и дека странските работници ангажирани преку програмата добиваат ист износ на надомест како американските работници.

Венс тврдеше дека „Мајкрософт“ отпуштил околу 6.000 работници и поднел 6.800 апликации за виза H1B во истиот период, што според него е доказ дека компанијата користи странски работници за да ги замени домашните и да им ги намали платите. Вкупниот број на визи H1B, кои се предуслов за секој што сака да помине низ процесот PERM, е ограничен на 85.000 годишно. Според компанијата „Ellis“, која им помага на многу технолошки компании при вработување квалификувани работници од странство, просечната плата на работник со H1B во „Мајкрософт“ изнесува 155.000 долари.

Саќа Надела, долгогодишниот извршен директор на „Мајкрософт“, во четвртокот беше во Белата куќа за да прими медал за технолошка иновација од претседателот Доналд Трамп. Надела присуствуваше и на други неодамнешни настани во Белата куќа, меѓу кои и ручек посветен на вештачката интелигенција и државна вечера за кинескиот претседател Си Џинпинг. Секоја голема технолошка компанија во САД вработува странски работници преку програмата H1B, меѓу кои Amazon, Google, Meta, Apple и Nvidia, но ниту една од нив не беше спомената во коментарите на Венс во четвртокот. Во последната фискална година, американското Министерство за труд сертифицираше повеќе од 130.000 апликации PERM во десет деловни категории.