Бајнанс покри 90 отсто од украдените 6,3 милијарди долари, ФБИ го обвинува Пјонгјанг

Најголемата светска криптовалутна берза Бајнанс соопшти дека покрила 90 отсто од средствата во вредност од 6,3 милијарди долари украдени при хакерскиот напад во четвртокот. Од компанијата додаваат дека за преостанатите 10 отсто ќе биде потребно подолго време за да се обезбедат потребните суми.

Бајнанс постојано вети дека ќе ги покрие 100 отсто од загубите од она што се смета за најголем хакерски напад врз криптосекторот досега и наведе дека одвоила повеќе од 6,34 милијарди долари сопствени средства за таа цел. „Бајнанс ќе го апсорбира финансискиот удар од овие украдени средства, а не нашите корисници“, се вели во соопштението на компанијата од саботата. Во неделата берзата информираше дека подигањето средства е обновено на неколку нејзини мрежи, откако беше суспендирано по нападот, а претходно најави дека тоа ќе се одвива во фази.

Федералното биро за истраги (ФБИ) во саботата соопшти дека Северна Кореја е одговорна за нападот. Според ФБИ, хакерите ги конвертирале украдените средства во криптовалутата етериум, по што се очекува тие повторно да бидат конвертирани преку децентрализирани финансии и услуги за моментална размена. Две аналитички компании претходно изјавија за Би-Би-Си дека имаат силни сознанија кои упатуваат на севернокорејската државно поддржана хакерска единица „Лазарус“, позната и како „ТрејдерТрејтор“, која ФБИ конкретно ја именуваше, како веројатен извршител.

Од Бајнанс наведуваат дека украдените средства ги надополниле преку различни фондови и сопствената корпоративна каса. Покриени се сите поседи на криптовалутите биткоин, етериум и тетер, како и на седум други широко тргувани криптосредства. Нападот се смета за најголем во историјата и го надминува рекордот од 1,5 милијарди долари украдени од берзата Бајбит во 2025 година, за што ФБИ исто така соопшти дека одговорна е Северна Кореја. Пјонгјанг отсекогаш негирал вмешаност во вакви напади.

Првичната истрага на Бајнанс укажала дека бил компромитиран лаптоп на инженер, што овозможило неовластени подигања на средства, но подоцнежно ажурирање открило „дополнителни точки на пробив“. Ричард Тенг, копретседател на берзата, изјави дека нападот го извршиле повеќе од едно лице и дека хакерите користеле софистицирани методи за прикривање на трагите, меѓу кои и „механизам за самоуништување“. Во петокот компанијата соопшти дека замрзнала околу 3 милијарди долари украдени средства по соработката со органите за спроведување на законот, разузнавачки фирми и партнери, а истрагата продолжува. Американската Тајна служба во петокот наведе дека „работи деноноќно“ со партнери од приватниот сектор „за идентификување, замрзнување, следење и враќање на средствата“ украдени од Бајнанс.

Бајнанс, основана во Кина во 2017 година, им овозможува на корисниците да купуваат, продаваат и тргуваат со дигитални средства и според проценките има стотици милиони корисници ширум светот. Криптовалутите се дигитални средства кои не постојат физички, туку се достапни преку дигитални паричници или компјутери.