Баерн Минхен сè поблиску до нов договор со Хари Кејн

Баерн Минхен е сè поблиску до постигнување договор со Хари Кејн за продолжување на соработката, откако во клубот расте оптимизмот дека капитенот на англиската репрезентација ќе остане на „Алијанц Арена“. Преговорите меѓу двете страни траат веќе подолг период, но во текот на летото добиле дополнителен интензитет, а од Англија пристигнуваат информации дека во Минхен владее уверување оти напаѓачот ќе ја продолжи авантурата во германскиот шампион.

Актуелниот договор на Кејн со Баерн истекува во 2027 година, поради што клубот сака што поскоро да ја затвори оваа тема и да обезбеди долгорочна иднина со својот најдобар стрелец. Според информациите, германскиот шампион дури посакува новиот договор да биде потпишан за време на следната репрезентативна пауза. Првичниот план бил целата работа да биде завршена уште во текот на летото, но преговорите се одолговлекле, главно поради тоа што Кејн не брзал со одлуката и внимателно ги разгледувал сите можни опции.

Неговиот тим сериозно ја анализирал можноста Англичанецот да го напушти Минхен, а една од опциите била и Саудиска Арабија. Ал-Хилал во еден момент го означил Кејн како главна трансферна цел и разговарал со неговите претставници, меѓу кои и неговиот брат и агент Чарли Кејн. Сепак, оваа опција никогаш не изгледала особено реално, а клубот на крајот се насочил кон Оли Воткинс.

Многу поатрактивни би биле опциите за враќање во Премиер-лигата, каде Манчестер Јунајтед и Тотенхем би можеле да се обидат да го доведат искусниот напаѓач. Како можна дестинација се споменува и Шпанија, каде Реал Мадрид одамна го цени Кејн, но со Килијан Мбапе како главна ѕвезда во нападот, ситуацијата на „Сантијаго Бернабеу“ не изгледа едноставна. Барселона, пак, би можела да биде многу посериозна опција, бидејќи каталонскиот гигант во 2027 година би можел да бара нов класичен напаѓач, а Кејн како слободен фудбалер би бил исклучително атрактивно решение. Приоритет на Барселона наводно е Хулијан Алварез, но евентуалниот трансфер на Аргентинецот би бил исклучително сложен.

Сепак, сите овие сценарија во моментов се во втор план. Во Баерн веруваат дека Кејн сака да остане дел од проектот и дека неговиот однос со клубот е одличен. Дополнителна причина за оптимизам е и неговата фантастична форма, откако Англичанецот неодамна стигна до јубилејните 100 голови во Бундес-лигата. Откако пристигна во Минхен, Кејн одигра 153 натпревари за Баерн, на кои постигна неверојатни 150 голови и запиша 34 асистенции, што доволно говори за неговата важност за тимот.

Доколку новиот договор биде потпишан, Баерн ќе го задржи еден од најкомплетните напаѓачи во светскиот фудбал и ќе ја отстрани неизвесноста околу својата иднина во нападот, додека Кејн ќе добие можност да продолжи да ги руши рекордите во германскиот шампионат во дресот на клубот во кој ја живее најдобрата голгетерска форма во кариерата.