Баерн Минхен го уништи Лајпциг со 6:1 во дербито на колото

По две нерешени средби во низа, една во домашното првенство и една во Лигата на шампионите, Баерн Минхен се врати на победничките патеки. Актуелниот германски првак немаше милост и го растури тимот на Лајпциг со убедливи 6:1 во натпревар кој требаше да биде дерби на колото во Бундеслигата.

Тренерот на Баерн, Винсент Компани, најавуваше дека неговиот тим е подготвен да блесне, а дека тоа е навистина така се покажа и на теренот. Серијата погодоци ја започна Луис Дијас во 12. минута, а до крајот на првиот дел во листата на стрелци кај домаќините се запишаа и Павловиќ и Олисе, со што Баерн веќе на полувреме имаше сигурна предност.

Во второто полувреме Дијас постигна уште два гола за комплетирање на хет-трик, а не можеше да се случи Баерн да постигне толку голови, а барем еднаш во листата на стрелци да го нема Хари Кејн. Англискиот репрезентативец погоди во 52. минута кога се израдува на 5:0.

Во последните моменти од мечот, Лајпциг преку Максимовиќ постигна почесен погодок и го ублажи поразот, но тоа беше само формалност во натпревар во кој Баерн целосно доминираше.

Со оваа победа Баерн се искачи на врвот на табелата, искористувајќи го денешниот кикс на Борусија Дортмунд која ремизираше кај Унион Берлин. Утре се игра уште едно дерби и тоа меѓу Баер Леверкузен и Фрајбург, а доколку гостите победат, тие ќе го преземат првото место на табелата во Бундеслигата.

Триумфот на Баерн со 6:1 претставува јасна порака дека тимот на Компани е подготвен да се бори за титулата, а поразот на Лајпциг го става под знак прашалник неговиот настап во продолжението од сезоната.