Авиокомпаниите бараат одговорност од „Нејтс“ по новиот дефект во британскиот воздушен сообраќај

Авиокомпаниите побараа „акција и одговорност“ за услугите за контрола на летањето во Обединетото Кралство, откако уште еден технички проблем предизвика прекини во воздушниот сообраќај по втор пат во рок од две недели. Дефектот се појави во понеделникот наутро во Националните служби за воздушен сообраќај („Нејтс“), овој пат во вториот контролен центар во Прествик, Шкотска.

Проблемот, кој главно ги зафати Шкотска, Северна Ирска и северна Англија, беше отстранет околу 10.30 часот, но дури откако авиокомпаниите, меѓу кои „Бритиш ервејз“ и „Изиџет“, беа принудени да откажат летови. Според аналитичарите од „Сириум“, најмалку 200 летови кон и од британските аеродроми требало да бидат откажани до крајот на понеделникот. Претставник на „Нејтс“ изјави дека проблемот е „неповрзан со случајот од пред две недели“ и се извини за прекините.

Министерката за транспорт Хајди Александар објави дека најновиот технички проблем е решен и додаде дека може да има одредени доцнења додека системите се стабилизираат. Инцидентот се случи помалку од две недели по сериозните проблеми во контролниот центар на „Нејтс“ во Англија, кои го нарушија патувањето на стотици илјади патници, и само три дена по објавувањето на првичниот извештај на „Нејтс“ со ветување за „постојано подобрување на критичната услуга“.

Авиокомпаниите реагираа остро на повторените дефекти. „Рајанер“ го повтори барањето главниот извршен директор на „Нејтс“, Мартин Ролф, да поднесе оставка. „Изиџет“ соопшти дека најновиот прекин „повторно ја доведува во прашање отпорноста на системите на ‚Нејтс‘ и покажува потреба од цврсти мерки за спречување на овие повторени дефекти“. „Бритиш ервејз“ го опиша случајот како „уште еден технички дефект кај ‚Нејтс‘“ и „разочарувачки“.

Главниот извршен директор на „Џет2“, Стив Хипи, изјави дека „едноставно не е доволно добро оваа критична национална инфраструктура постојано да ги разочарува клиентите“, додавајќи дека на клиентите и авиокомпаниите им се потребни „акција, одговорност и соодветна отпорност, и тоа итно“. Главниот оперативен директор на „Рајанер“, Нил Мекмахон, рече дека повеќе од 25. 000 патници на „Рајанер“ веќе претрпеле пречки, со повеќе од 140 одложени летови на компанијата, и порача: „Доста е. Мартин Ролф треба да поднесе оставка денес.

Ролф, кој минатата година заработил 1,4 милиони фунти вклучително и бонуси, се најде под зголемен притисок по големиот прекин на 8 септември, третиот инцидент со висок профил во период од само три години. Тој се извини и изјави дека презема „целосна одговорност“, но „Нејтс“ негираше дека инцидентите се поврзани. Во јули 2005 година проблем поврзан со радар предизвика дефект во контролата на летањето, а во август 2023 година повеќе од 700.000 патници имаа нарушено патување откако „проблематичен план за лет“ предизвика откажување на системот.

Александар ја задолжи Цивилната воздухопловна управа да спроведе независна проверка на „Нејтс“ и да ги провери наодите од првичниот извештај за дефектот на 8 септември. Таа изјави дека владата сè уште треба „идно да разбере зошто овој проблем не бил откриен и отстранет пред да предизвика хаос“.