Апелациониот суд во Скопје го ослободи Боки 13 во предметот „Меѓународен сојуз
Автор: Редакција на FinPortal.mk ·
Апелациониот суд во Скопје донесе ослободителна пресуда за Бојан Јовановски-Боки 13 во предметот „Меѓународен сојуз“, со што ја преиначи првостепената пресуда со која тој беше осуден на пет години затвор. Информацијата ја објави неговиот адвокат Сашко Дуковски. Според соопштението на адвокатот, ослободени се и другите обвинети во истиот случај. „Ете, правдата е спора но достижна! Апелациониот Суд во Скопје денес донесе ослободителна пресуда за Бојан Јовановски во предметот ‘Меѓународен сојуз’. Со тоа ја преиначи првостепената пресуда на Основниот кривичен суд од 5 години“, објави Дуковски. Одлуката претставува нов пресврт во предметот кој со години се водеше против Јовановски и повеќе други обвинети за наводни финансиски злоупотреби поврзани со невладината организација „Меѓународен сојуз“. Во претходната постапка, Апелациониот суд веќе ја потврди ослободителната пресуда за поранешната пратеничка Фросина Ташевска-Ременски, додека првичните пресуди за дел од останатите обвинети беа укинати и предметот беше вратен на повторно судење. Во октомври 2025 година, по повтореното судење, Јовановски беше осуден на пет години затвор за измама и перење пари. Според денешното соопштение на неговиот адвокат, таа пресуда сега е преиначена во ослободителна. Дуковски ја поздрави одлуката со оценката дека по лошо обвинение следува ослободителна пресуда.