Андоновски во Струмица: Електронските услуги достапни за секој граѓанин, отворен 18-ти Центар за услуги

Министерот за дигитална трансформација, Стефан Андоновски, заедно со градоначалникот на Општина Струмица, Петар Јанков, го посети новиот Центар за услуги – ЕТУ Струмица, кој е сместен во општинската зграда. Со неговото отворање, како што беше соопштено, Струмица станува дом на 18-тиот Центар за услуги во Македонија, со што граѓаните на оваа општина и на околните места добиваат директен пристап до 350 услуги достапни преку Националниот портал за електронски услуги – uslugi.gov.mk.

Во изјавата за медиумите по повод посетата, министерот Андоновски истакна дека отворањето на новиот центар е резултат на успешната соработка меѓу Министерството за дигитална трансформација и локалната самоуправа, која го обезбедила просторот за неговото функционирање. Тој потсети дека Струмица е во фокусот на министерството, како што, како што рече, беше ветено во текот на кампањата и како што беше разговарано со градоначалникот Јанков.

„Како што ветивме во текот на кампањата и како што разговаравме со градоначалникот, Струмица е во фокусот на Министерството за дигитална трансформација. Големо е задоволството што тука го отвораме 18-тиот Центар за услуги во Македонија. Во одлична соработка со локалната самоуправа, нашите вработени сега се достапни да им ги понудат 350-те услуги од Националниот портал на граѓаните од Струмица и од целиот регион“, изјави Андоновски.

Министерот посочи дека центарот е наменет за сите граѓани, а особено за оние кои немаат можност, не сакаат или не знаат самостојно да ги користат електронските услуги од својот дом. Со поддршка од вработените во центарот, тие ќе можат полесно да пристапат до потребните услуги на едно место, без да мора да поминуваат низ повеќе институции или да чекаат во редови.

„Секој граѓанин кој не е во можност или не знае како да користи електронски услуги од дома, тоа ќе може да го направи тука, во Центарот за услуги. Уверението за државјанство, потврдите за неосудуваност, за кривична и казнена евиденција, изводите од матичните книги на родени, венчани и умрени, како и услугите од Агенцијата за катастар, се достапни на едно место во Струмица“, нагласи министерот Андоновски.

Градоначалникот на Општина Струмица, Петар Јанков, се заблагодари за успешната соработка со Министерството за дигитална трансформација и изрази желба таа да продолжи и во иднина, во интерес на граѓаните на општината. Тој ги повика граѓаните да ги користат услугите на новиот Центар за услуги, кои, како што рече, ќе им заштедат време и ќе го олеснат процесот на добивање на потребните документи.

Покрај пристапот до услугите, центарот има и едукативна улога, преку која граѓаните ќе добиваат насоки и помош за користење на електронските услуги. На тој начин, како што беше посочено, се поттикнува дигиталната писменост и се овозможува поголем број граѓани самостојно да ги користат предностите на електронската управа во иднина.

Андоновски истакна дека соработката со Општина Струмица продолжува и понатаму, со цел електронските услуги да стигнат до секој граѓанин, без разлика на неговата возраст, место на живеење или степен на дигитална писменост. Отворањето на 18-тиот Центар за услуги во Македонија претставува чекор кон остварување на таа цел, со оглед на тоа што граѓаните од Струмица и од околните општини веќе имаат можност да ги завршат своите административни обврски на едно место, со непосредна помош од вработените.