Андоновски: Личната карта и возачката дозвола наскоро ќе бидат достапни преку мобилната апликација м.Услуги
FinPortal.mk · 12.9.2026 г.
Министерот за дигитална трансформација, Стефан Андоновски, најави дека новата мобилна апликација м.Услуги, која во моментов се тестира, ќе им овозможи на граѓаните личната карта и возачката дозвола да ги имаат во електронска форма директно на својот мобилен телефон. Според него, апликацијата е веќе подготвена и во октомври ќе биде организиран голем настан на кој таа официјално ќе биде промовирана пред јавноста. Андоновски ова го изјави за време на гостувањето во емисијата „Меѓу редови“ на Алфа ТВ, каде што детално ги објасни целите и функционалноста на новата дигитална алатка. Според министерот, м.Услуги е замислена како единствено место преку кое граѓаните ќе можат да пристапуваат до своите документи и до услугите на државата, со што значително ќе се намали потребата од користење на повеќе различни апликации и системи. „Ветив дека во втората половина од мандатот ќе успееме да подготвиме мобилна апликација. Сега конечно можам да кажам дека таа е подготвена и во моментов ја тестираме. Во октомври ќе организираме голем настан на кој ќе ја промовираме пред граѓаните“, истакна Андоновски. Министерот појасни дека во почетната фаза преку апликацијата ќе бидат достапни електронската возачка дозвола и електронската лична карта, како и неколку електронски услуги од јавната администрација. „Ја замислуваме како апликација што ќе ви биде потребна за сè што сакате да завршите, а е поврзано со државата. Во моментов постојат повеќе различни апликации и системи, а нашата цел е услугите за граѓаните да ги обединиме на едно место“, рече тој. Андоновски нагласи дека користењето на апликацијата нема да биде задолжително и дека граѓаните ќе можат и понатаму да ги користат постојните физички документи за идентификација. „Во изминатиов период добив многу прашања во врска со ова. Сакам да потенцирам дека апликацијата нема да биде задолжителна. Граѓаните кои не сакаат да ја користат нема да мора да ја преземат и ќе можат да продолжат да ги користат постојните документи за идентификација. Ап