Американските сопственици на домови имаат рекордно станбено богатство, но не го трошат

Американските сопственици на домови располагаат со повеќе станбено богатство од кога било досега, благодарение на брзиот раст на цените на недвижностите во изминатите неколку години. Сепак, тие не трошат голем дел од тоа богатство, покажуваат податоците на компанијата за податочна технологија Cotality, објавени од CNBC.

Во вториот квартал од оваа година, вкупното таканаречено „достапно“ станбено богатство изнесувало 11,5 трилиони долари. Тоа е износот што должниците би можеле да го земат како кредит, а притоа да остварат доволно вредност во домот за да ги задоволат условите на кредиторите. Вкупното богатство на должниците со хипотека изнесува 17,9 трилиони долари, односно во просек по 310.000 долари на сопственик на дом — што е за 6.000 долари повеќе отколку во претходните три месеци.

Иако сопствениците на домови во вториот квартал одобриле речиси 20 отсто повеќе втори хипотеки или кредитни линии врз основа на станбено богатство (HELOC) во споредба со првиот квартал, тоа сепак претставувало помалку од 0,1 отсто од вкупното достапно богатство што можеле да го искористат. „Должниците со најголемо станбено богатство најчесто се најмалку склони да го искористат“, изјавил Том Мелоун, главен економист во Cotality. „Тие обично имаат ниски каматни стапки на хипотеката, силни парични текови и малку причини да се преселат.

Богатството е нерамномерно распределено и разликите се продлабочуваат. Просечното станбено богатство на сопствениците на домови во Хаваи и Калифорнија надминува 600.000 долари, а во Масачусетс е над 400.000 долари. Наспроти тоа, во Луизијана, Оклахома и Ајова изнесува само нешто над 100.000 долари. Додека сопствениците во повеќето сојузни држави забележале раст на богатството, во некои — како Тексас, Минесота, Колорадо и Мериленд, како и во округот Колумбија — вредноста на домовите паѓа, поради што тие губат богатство. Уделот на должници кои должат повеќе отколку што вредат нивните домови, таканаречени хипотеки под вода, останува ниски 2,1 отсто.