Американската парична маса М2 расте со најбрзо темпо во три години — предупредување додека инфлацијата стои на 3,4 отсто

Американската парична маса М2 во јули годинава пораснала за околу 5,4 отсто на годишно ниво, што е најбрз раст од јуни 2022 година, кога инфлацијата беше во полн замав. Овој податок доаѓа во момент кога инфлацијата во САД сè уште не е вратена на целта на Федералните резерви, што според дел од економистите може да биде знак за нови ценовни притисоци.

Инфлацијата во август изнесувала 3,4 отсто на годишно ниво, мерено преку индексот на потрошувачки цени (CPI), додека основната инфлација, без понестабилните цени на храната и енергијата, изнесувала 2,4 отсто. Тоа е далеку под нивото од над 9 отсто забележано во 2022 година, кога инфлацијата беше највисока во последните 40 години, но и понатаму над целта на Фед од 2 отсто. Федералниот комитет за отворен пазар (FOMC) неодамна ја зголеми основната каматна стапка за првпат во три години.

М2 ја опфаќа готовината во оптек и средствата што лесно се претвораат во готовина, како пари на тековна или штедна сметка, но и орочени депозити помали од 100.000 долари и парични фондови. Дел од економистите ја гледаат паричната маса како водечки показател за инфлацијата, бидејќи повеќе пари во системот значи повеќе средства достапни за трошење, што ја поттикнува побарувачката, а со тоа и цените.

Дали М2 е водечки показател за инфлацијата останува предмет на дебата. Актуелниот претседател на Фед, Кевин Ворш, и поранешниот претседател Џером Пауел, изразиле различни ставови. Пауел пред пет години пред Конгресот изјавил дека М2 „нема навистина важни импликации за економските изгледи“ и дека класичната врска повеќе не важи. Ворш, пак, во јули го спомнал М2 како начин да се „измери залихата на пари“ и додал дека доколку Фед посветел поголемо внимание на М2 за време на пандемијата, можеби ја видел високата инфлација што доаѓа. Тој сепак нагласил дека не настапува како монетарист и дека современиот централен банкар треба да има мозаик од информации.