Амазон им порача на инженерите: „Токенмаксирањето“ не е вистинска мерка за користење на вештачка интелигенција

Амазон им препорача на своите софтверски инженери да не го користат исклучиво бројот на потрошени токени или генериран код како мерка за усвојување на вештачката интелигенција, оценувајќи ги таквите показатели како „длабоко погрешни“. Ова произлегува од интерен меморандум што компанијата го споделила со вработените во септември, а кој во вторникот беше објавен на нејзината веб-страница.

Во документот се наведува дека компанијата само што почнува да ги гледа ефектите од вештачката интелигенција врз софтверското инженерство и дека и покрај јасната визија за иднината, многу работи сè уште се во развој. „Сигурни сме дека, какви и да бидат идните најдобри практики, вештачката интелигенција ќе биде во центарот на софтверското инженерство“, се вели во меморандумот.

Под раководството на извршниот директор Енди Џеси, Амазон брзо ја интегрираше вештачката интелигенција во широките деловни операции на компанијата. Џеси претходно предвиде дека технологијата ќе го „промени обемот и брзината“ на секојдневната работа и дека во следните неколку години може да го намали корпоративниот кадар преку автоматизација, но истакна дека ќе создаде и „други работни места“.

Компаниите се соочуваат со растечките трошоци за вештачка интелигенција и со прашањето како сигурно да измерат дали алатките носат зголемена продуктивност или друг вреден поврат на инвестицијата. Амазон во мај го затвори интерниот рангиран список откако откри дека вработените го практикуваат таканареченото „токенмаксирање“ — максимално користење на вештачка интелигенција со мало внимание кон резултатот — за да се искачат на листата. Компанијата соопшти дека не вовела ограничувања за користењето на токени од страна на вработените.

Во меморандумот Амазон наведува дека показателите како потрошувачката на токени, стапката на усвојување на алатките и бројот на промени или прегледи на кодот треба да се разгледуваат „со внимание и проценка“ заедно со други податоци, бидејќи можат да доведат до повисоки трошоци и прекумерна сложеност. Компанијата не побарала од вработените целосно да ги игнорираат тие показатели.

„Ако вашата работа не има корист од сегашните алатки за вештачка интелигенција, тоа е наод, а не неуспех“, се наведува во документот.