Амазон доби варанти за акции во Џенерак — производителот на генератори скокна над 40%

Амазон доби варанти за купување на акции во Џенерак во вредност до 340 милиона долари, како дел од договор за снабдување со резервни генератори за неговите дата-центри. Веста предизвика силен раст на акциите на производителот на генератори, кои во продолженото тргување во средата скокнаа за повеќе од 40 отсто.

Според документот што Џенерак го достави до регулаторните органи, компанијата му издала варанти на Амазон за стекнување на до 1,69 милион акции по цена од 200,93 долари за акција. Вкупната инвестиција што може да произлезе од оваа трансакција би можела да достигне и до 8 милијарди долари.

Договорот предвидува Џенерак да го снабдува Амазон со резервни генератори за неговите дата-центри. Првичните испораки се очекува да изнесуваат вкупно 2,4 милијарди долари во 2027 и 2028 година, се наведува во документот.

Варантите што ги доби Амазон претставуваат речиси 3 отсто од вкупно издадените акции на Џенерак. Пазарната капитализација на компанијата изнесуваше околу 10,3 милијарди долари заклучно со затворањето на тргувањето во средата.