Алијанса за Албанците: Не сме гости во државата и нема да бидеме заложници на политички калкулации

Алијансата за Албанците излезе со остра реакција во која порачува дека Албанците не се гости во оваа држава и нема да прифатат да бидат заложници на ничии политички калкулации. Во соопштението се наведува дека Албанците отсекогаш ги почитувале и поддржувале идентитетот, јазикот и достоинството на своите сограѓани Македонци, дури и кога таа почит не била взаемна, и дека никогаш не го оспорувале нивниот идентитет, додека самите тие и понатаму се дефинирани во Уставот со понижувачката формулација од 20 проценти.

Од партијата потенцираат дека Албанците сочинуваат речиси една третина од населението, поради што, како што велат, не можат да бидат третирани како гости и нема да дозволат да бидат заложници на политички калкулации. Тие ја повторуваат пораката дека договорот е договор и дека обврските од 2022 година мора да се исполнат, без разлика дали тоа му се допаѓа на премиерот Христијан Мицкоски или не.

Според Алијансата за Албанците, стравот од хипотетички услови од страна на Бугарија не може да служи како оправдување за блокирање на европската иднина на државата. Од партијата оценуваат дека Мицкоски бил во поповолна позиција во 2024 година отколку што е денес, во 2026 година, и предупредуваат дека ако продолжи вака, во 2028 година најверојатно ќе биде во уште послаба позиција.

Во соопштението се нагласува дека времето покажува оти колку подолго се одолговлекува процесот, толку поскапо ја плаќаат цената сите граѓани, без разлика на етничката припадност. Како последици од одолговлекувањето се наведуваат заминувањето на младите, иселувањето на семејствата и тоа што политиката продолжува да купува време.

Од Алијансата за Албанците потсетуваат дека поранешниот премиер Никола Груевски им изгубил една деценија на граѓаните и порачуваат дека Албанците нема да чекаат уште една деценија за Мицкоски. Тие ја повикуваат владата да го проголта овој залак, да ги усвои уставните измени и да го отвори европскиот пат, со порака дека ако утре се појават нови пречки, тогаш треба да се соочат со нив.

Партијата наведува дека покажала трпение, разбирање и поддршка, но предупредува дека трпението не е бесконечно. Од Алијансата за Албанците порачуваат дека на европскиот пат власта не е сама, но и дека не треба да ги принудуваат Албанците да ги остават сами во политичката блокада, оценувајќи дека тоа не би бил добар пат за никого.

Во соопштението се наведува и дека Алијансата за Албанците нема да поддржува политики што ја жртвуваат иднината на граѓаните за партиски интереси. Партијата завршува со пораката дека е доста со изговори и дека време е за одлуки денес, а не во 2028 година.