Алегри по ремито со Рома: „Минатата година им ја ставија Лигата на шампионите в џеб

Тренерот на Наполи, Масимилијано Алегри, предизвика нов скандал во италијанскиот фудбал откако по возбудливото дерби со Рома, кое заврши 3-3, упати остра порака за судењето и за борбата за пласман во Лигата на шампионите. Натпреварот на стадионот „Диего Армандо Марадона“ понуди шест погодоци и големи пресврти, но остана во сенка на црвениот картон што Алегри го доби по интервенција на главниот судија Андреа Коломбо.

Исклучениот стратег не го криеше разочарувањето и сметаше дека е престрого санкциониран. „Четвртиот судија го повика главниот арбитар и веднаш ми покажа црвен картон, иако не кажав ништо. Следниот пат едноставно ќе седам на клупата без да мрднам. Изгледа ме исклучуваат во моментот кога ќе станам“, изјави Алегри по натпреварот.

Тој потсети и на претходните казни што ги добивал, посочувајќи на, според него, различен аршин кон тренерите во Серија А. „Минатата година платив казна од 80.000 евра. Можеби најдобро ќе биде воопшто да не излегувам на теренот. Гледам како другите постојано гестикулираат и прават што сакаат, но поминуваат без никакви санкции“, истакна тренерот на Наполи.

Најголемата бура, сепак, ја предизвика неговата изјава по завршувањето на официјалната прес-конференција. Додека ја напуштал салата за медиуми, Алегри упатил коментар што веднаш привлече големо внимание. „Минатата година им ја ставија Лигата на шампионите в џеб. Секогаш истата приказна!“ рекол тој.

Оваа изјава беше директна алузија на минатосезонската борба за пласман во Лигата на шампионите. Рома, предводена од Џанпјеро Гасперини, успеа да обезбеди место во елитното натпреварување на сметка на Милан, кој тогаш го водеше токму Алегри.

Самото дерби понуди многу возбудувања и пресврти. Наполи поведе со 2-0, но Рома успеа да се врати и да израмни на 2-2. Домаќините повторно поведоа, но гостите во завршницата стигнаа до конечните 3-3. Наполитанците влегоа во натпреварот и физички истоштени по европската пресметка и победата од 3-2 над Бодо/Глимт.

И покрај испуштените два бода, Алегри смета дека неговиот тим покажал позитивни знаци и најави уште поофанзивен пристап во следните натпревари. „Тимот одигра квалитетно, дури и во дефанзивата, против исклучително силен противник. Ако го задржиме овој пристап, сигурно ќе имаме позитивни резултати“, порача тренерот на Наполи.