Алцхајмер матине“ во Скопје: музика, приказни и емпатија за луѓето со деменција

По повод Светскиот ден на Алцхајмеровата болест, 21 септември, здружението на граѓани Институт за Алцхајмерова болест и невронаука денеска организира настан под наслов „Алцхајмер матине – Она што останува: љубов, емоција, емпатија“. Според организаторите, целта на средбата е да се влијае кон подигнување на јавната свест за болеста што ја нарекуваат епидемија на 21 век.

Настанот е замислен како топла и емотивна средба посветена на она што останува и тогаш кога сеќавањата почнуваат да бледнеат – љубовта, човечката поврзаност и потребата да бидеме разбрани и прифатени. Преку музика, лични приказни, едукација и пораки на надеж и поддршка, организаторите ќе потсетат дека зад секоја дијагноза стои човек со своја животна приказна, достоинство и потреба за љубов и припадност.

„Алцхајмер матине“ е топол и поддржувачки собир кој ги поврзува лицата со деменција, нивните семејства, здравствените работници и пошироката заедница. Во тој простор на разбирање и споделување ќе се разменуваат лични искуства, корисни совети и професионално знаење, со цел темата на Алцхајмеровата болест да се доближи до пошироката јавност и да се поттикнат емпатијата, навременото препознавање и заедничката грижа, се вели во соопштението од организаторите.

Во соопштението се додава дека во Македонија живеат повеќе од 24.000 лица со деменција, од кои најмалку 10.000 со Алцхајмерова болест. Исто толку семејства секојдневно се справуваат со предизвиците што ги носи болеста.

Според организаторите, токму затоа е важно темата да не остане затворена во клинички рамки, туку да се отвори кон секојдневниот живот на семејствата кои секој ден учат како да живеат со болеста. Средбата е замислена како простор каде што искуството на едните им помага на другите, а професионалното знаење се споделува со оние на кои им е најпотребно.

Светскиот ден на Алцхајмеровата болест се одбележува секоја година на 21 септември и претставува повод за потсетување на важноста од навремено препознавање, поддршка на семејствата и достапна грижа. Организаторите на „Алцхајмер матине“ порачуваат дека зад секоја дијагноза стои човек со своја приказна и дека разбирањето и прифаќањето се исто толку важни како и медицинскиот третман.

Настанот е отворен за лицата со деменција, нивните семејства, здравствените работници и пошироката јавност, со цел темата да се доближи до што поголем број граѓани и да се поттикне заедничката грижа.