Акциите на „Парамаунт“ и „Ворнер брос“ растат по напредокот во преговорите за спојување
Автор: Редакција на FinPortal.mk ·
Акциите на „Ворнер брос дискавери“ (WBD) и „Парамаунт скајденс“ (PSKY) пораснаа во понеделникот, откако се појавија извештаи дека преговорите за спогодба со калифорниските власти напредуваат. Според податоците од пазарот, акциите на „Ворнер брос“ забележаа раст од 7 отсто, додека хартиите на „Парамаунт“ пораснаа за 5 отсто. Во основата на ова движење е напредокот во разговорите меѓу „Парамаунт“ и калифорнискиот државен обвинител Роб Бонта. Калифорнија претходно се обиде да ја блокира аквизицијата на „Ворнер брос“ од страна на „Парамаунт“, вредна 111 милијарди долари, повикувајќи се на антимонополски причини. Според предлогот за спогодба, доколку дојде до финализирање, комбинираната компанија ќе се соочи со финансиски казни ако не успее да објавува најмалку 30 филма во кино салите секоја година. Инаку, дванаесет демократски државни обвинители, заедно со Здружението на сценаристи на Америка, поднесоа тужба за блокирање на аквизицијата на „Ворнер брос дискавери“ од страна на „Парамаунт скајденс“, повторно поради антимонополски причини. Државите тврдеа дека договорот би дал на „Парамаунт“ преголема контрола врз филмската и кабелската телевизиска индустрија. Преговорите за спогодба меѓу „Парамаунт“ и калифорнискиот обвинител Бонта се забрзаа во последните денови, иако конечен договор сè уште не е постигнат. Преземaњето на „Парамаунт“ дојде по наддавачката битка со „Нетфликс“, која претходно даде понуда за „Ворнер брос дискавери“. Акционерите на „Ворнер брос“ ја одобрија ревидираната понуда на „Парамаунт“ во април, вреднувајќи ја зделката на приближно 111 милијарди долари, вклучувајќи го и долгот. Аквизицијата би ги проширила забавните средства под контрола на извршниот директор на „Парамаунт“, Дејвид Елисон, син на коосновачот на „Оракл“, Лари Елисон.