30.10.2026 - Современ дом АД Прилеп - Други ценовно чувствителни информации

Современ дом АД Прилеп за периодот јануари – септември 2026 година оствари позитивен финансиски резултат искажан во неревидираниот и неконсолидиран Биланс на успех, соопшти друштвото преку СЕИНет.

Вкупните приходи во првите девет месеци од 2026 година изнесуваат 77.099 илјади денари и во споредба со истиот период лани се зголемени за 2 отсто. Оперативните приходи достигнаа 77.045 илјади денари, што е раст од 3 отсто во однос на 75.143 илјади денари остварени од јануари до септември 2025 година.

Од друштвото наведуваат дека во континуитет реализираат стабилни приходи од издавање на деловен простор и недвижности, со тенденција значајно да ги подобрат севкупните деловни резултати преку издавање на целиот недвижен имот расположлив за издавање.

Финансиските приходи изнесуваат 54 илјади денари и се намалени за 75 отсто споредбено со 2025 година, кога изнесувале 217 илјади денари.

Вкупните расходи за периодот јануари – септември 2026 година изнесуваат 63.957 илјади денари, што е зголемување од 4 отсто во однос на истиот период лани. Оперативните расходи достигнаа 58.516 илјади денари и се зголемени за 11 отсто, додека финансиските расходи изнесуваат 5.441 илјада денари, со намалување од 37 отсто споредбено со 2025 година.

Нето добивката за периодот јануари – септември 2026 година е 13.142 илјади денари и е намалена за 6 отсто споредбено со претходната година, кога изнесувала 14.053 илјади денари.

Во делот за дивиденда, од друштвото информираат дека на редовното Годишно собрание во мај 2026 година не беше донесена одлука за распределба на остварената нето добивка за 2025 година. Од почетокот на годината до датумот на објава на образложението, друштвото нема извршено исплата на дивиденда.

Во наведениот период нема вложувања, продажба или отпис на материјални средства што претставуваат повеќе од 30 отсто од вкупната вредност на средствата на друштвото. Извршени се вложувања во објектите што друштвото ги користи за издавање под наем, со цел подобри услови за закупците согласно нивните потреби, но нивната вредност не е голема споредбено со вкупната вредност на средствата.

Нема ниту нови кредитни задолжувања што претставуваат повеќе од 30 отсто од вкупната вредност на средствата на друштвото. Во периодот нема промени во сметководствените политики и методите на вреднување на позициите во финансиските извештаи.

Од друштвото наведуваат дека во периодот за кој известуваат во најголем дел го реализирале интерниот план со утврдената динамика, а во наредниот период се очекува продолжување на исполнувањето на планот и вложувања во основните средства согласно потребите и моменталната финансиска ликвидност.